20 Lúnasa 2026
Léirítear an méid seo a leanas sa Suirbhé ar an bhFórsa Saothair don dara ráithe den bhliain 2026 agus san Eisiúint Mhíosúil is déanaí maidir leis an Dífhostaíocht:
- leanann an fhostaíocht de bheith ag fás, agus 21,200 post á gcruthú sa bhliain suas go dtí an dara ráithe den bhliain 2026
- is ionann fostaíocht iomlán agus 2.84 milliún duine anois
- bhí an fás fostaíochta forleathan ar fud na réigiún – tháinig méadú 12,000 duine (+0.6 faoin gcéad) ar an líon daoine atá san fhostaíocht lasmuigh de Bhaile Átha Cliath sa bhliain suas go dtí an dara ráithe den bhliain 2026
- tháinig méadú 13,500 duine (+0.6 faoin gcéad) bliain ar bhliain ar an líon daoine atá san fhostaíocht lánaimseartha sa dara ráithe, agus tháinig méadú 7,600 duine (+1.31 faoin gcéad) bliain ar bhliain ar an líon daoine atá san fhostaíocht pháirtaimseartha
- i mí Iúil 2026, b’ionann an ráta dífhostaíochta atá coigeartaithe de réir séasúir agus 5.1 faoin gcéad, cothrom le méadú 0.1 pointe céatadáin ar an ráta do mhí an Mheithimh 2026, suas ó 5.0 faoin gcéad i mí Iúil 2025
Léirítear i dtorthaí an tSuirbhé ar an bhFórsa Saothair a d’fhoilsigh an Phríomh-Oifig Staidrimh inniu gur tháinig fás leantach ar mhargadh saothair na hÉireann, agus 21,200 post á gcruthú sa bhliain suas go dtí an dara ráithe den bhliain 2026. Tá 2.84 milliún duine san fhostaíocht anois, cothrom le méadú de thart ar 0.75 faoin gcéad ar an bhfigiúr don dara ráithe den bhliain 2025.
Is céim dhearfach é sin i dtreo an sprioc atá i gClár an Rialtais a bhaint amach – is é sin, 300,000 post sa bhreis a chruthú faoin mbliain 2030, le tacaíocht ó infheistíochtaí straitéiseacha, ó bheartais thacúla fiontraíochta, agus ó dhíriú ar gheilleagar bríomhar a chothú. Tógann an tiomantas sin d’fhás leantach fostaíochta ar an bPáipéar Bán ar an bhFiontraíocht a d’fhoilsigh an Rialtas i mí na Nollag 2022, ina leagtar amach an treo straitéiseach le haghaidh cruthú post sna blianta atá le teacht.
Ag labhairt dó faoi na figiúirí, dúirt Peter Burke, an tAire Fiontar, Turasóireachta agus Fostaíochta:
"Tá athléimneacht agus fás láidir le feiceáil i Margadh Saothair na hÉireann go fóill, agus tá fostaíocht iomlán fós ag an leibhéal is airde riamh, agus 21,200 post á gcruthú sa bhliain seo a chuaigh thart. Bhí na gnóthachain sin leathanbhunaithe ar fud an gheilleagair, agus fás láidir ag teacht ar earnálacha amhail an tOideachas, an tIompar agus an Stóráil, agus an Tionscal.
"Is suite lasmuigh de Bhaile Átha Cliath atá formhór na bpost nua a cruthaíodh i mbliana, rud a léiríonn tiomantas an rialtais seo d’fhorbairt chothromaithe réigiúnach fiontraíochta agus dá chinntiú go mbíonn deiseanna ar fáil ar fud na tíre.
"Tá rún daingean ag an Roinn seo go fóill tacú le hoibrithe i rith a ngairmeacha. Trí bhearta amhail obair sholúbtha, bímid ag cabhrú le rannpháirtíocht fórsa saothair a mhéadú agus le margadh saothair níos éagsúla agus níos ionchuimsithí a chruthú a théann chun tairbhe d’oibrithe, do ghnólachtaí agus do phobail ar fud na hÉireann."
Dúirt an Tánaiste Simon Harris, an tAire Airgeadais:
"Léirítear i dtorthaí an lae inniu athléimneacht leantach ár margaidh saothair i bhfianaise na héiginnteachta suntasaí atá ann sa gheilleagar domhanda, agus an fhostaíocht ag sroicheadh an leibhéil is airde riamh de 2.84 milliún duine sa dara ráithe. Cuireadh breis agus 20,000 post leis le bliain anuas. Bhí an ráta dífhostaíochta fós íseal, agus é cothrom le 4.9 faoin gcéad sa dara ráithe.
"An tráth céanna, tá a fhios againn go mbíonn saol na hoibre ag athrú. Bíonn athruithe teicneolaíocha – go háirithe mearfhorbairt agus mear-imscaradh na hintleachta saorga – ag athmhúnlú chineál na hoibre in Éirinn cheana féin, agus ní mór dúinn a chinntiú go sealbhaíonn ár bhfórsa saothair na scileanna a theastaíonn chun leas a bhaint as na deiseanna sin.
"Agus sinn ag ullmhú do Bhuiséad 2027, is é tosaíocht an Rialtais cur leis an dul chun cinn a rinneamar, tacú lenár n-iomaíochas idirnáisiúnta, agus a chinntiú go léirítear neart ár ngeilleagair i gcónaí in ardchaighdeáin mhaireachtála do dhaoine ar fud na tíre. Bainfear an méid sin amach trí infheistíocht leantach i seirbhísí poiblí, trí fhás i gcaiteachas ar bhonneagar criticiúil agus, rud tábhachtach, trí phacáiste cánach lena dtacaítear le hoibrithe tráth atá brúnna costas maireachtála ag cur ualach ar an oiread sin daoine."
Tá nasc chuig an eisiúint ón bPríomh-Oifig Staidrimh le fáil anseo freisin: An Suirbhé ar an bhFórsa Saothair – An Dara Ráithe den Bhliain 2026 – An Phríomh-Oifig Staidrimh