7 Samhain 2024
Sheol an tAire Fiontar, Trádála agus Fostaíochta, Peter Burke TD, tuarascáil an tSainghrúpa ar Luach Domhanda agus Slabhraí Soláthair. Comhlíonann an tuarascáil ceann de na príomh-mholtaí atá inár Straitéis Trádála agus Infheistíochta 2022-2026: Luach d’Éireann, Luachanna don Domhan, a aithníonn an gá le measúnú saineolaíoch ar ionchais do Shlabhraí Luacha Domhanda, chomh maith leis na deiseanna agus na rioscaí atá ann d’Éirinn.
Tá rath na hÉireann i ndíolachán chuig margaí domhanda bunaithe ar a haclaíocht agus solúbthacht i bhfianaise cúinsí domhanda atá ag athrú. Le blianta anuas, d’éirigh le fiontair Éireannacha leas a bhaint as na láidreachtaí seo agus iad a oiriúnú chun buntáiste a bhaint as athruithe sa gheilleagar domhanda, de réir mar a tháinig samhlacha nua gnó chun cinn agus mar a d’fhorbair earnálacha atá ann cheana. Tá Infheistíocht Dhíreach Eachtrach tar éis Éire a nascadh go láidir le slabhraí luach domhanda, rud a chuir tacaíocht ar fáil do chuideachtaí Éireannacha chun rochtain a fháil ar GVCanna, ag spreagadh fáis i dtáirgiúlacht agus i nuálaíocht.
Nuair a foilsíodh an tuarascáil, leag an tAire béim ar an méid seo a leanas,
“Le bliain anuas, sháraigh trádáil iomlán na hÉireann aon trilliún euro, agus tháinig fás láidir i dtáirgí déantúsaíochta agus seirbhísí araon. Deimhníonn an Tuarascáil Shaineolaíoch go bhfuil bonn trádála na hÉireann fréamhaithe go docht san eacnamaíocht dhomhanda, áit a mbaintear úsáid shuntasach as ionchuir earraí agus seirbhísí ó mhargaí eachtracha in ár n-onnmhairí, agus ina theannta sin, cruthaítear breisluach suntasach go háitiúil. Mar thoradh air sin, soláthraíonn go leor dár n-onnmhairí ionchuir thábhachtacha do pháirtithe trádála eile, a úsáidtear chun earraí agus seirbhísí a tháirgeadh.”
Lean an tAire ar aghaidh ag rá,
“Tá mo Roinn ag dul chun cinn anois chun na moltaí maidir le beartas ón Sainghrúpa, atá á dtacú ag an gComhairle Trádála agus Infheistíochta, atá i gcathaoirleacht agam, agus atá a gcur i gcrích moltaí a cuireadh chun cinn níos luaithe i mbliana. Déanfaidh an Chomhairle monatóireacht ar chur i bhfeidhm na dtionscnamh tábhachtacha seo.”
Deimhníonn anailís ón Sainghrúpa ar rannpháirtíocht chun tosaigh agus ar ais na hÉireann i GVCanna, go bhfuil comhpháirtíochtaí trádála na hÉireann tar éis éirí níos ilghnéithí agus níos domhandaithe. Taispeánann sé athrú suntasach i gcomhdhéanamh na n-áiteanna a mbíonn cuideachtaí Éireannacha ag fáil ionchuir do na h-onnmhairí atá acu, ag léiriú pictiúr i bhfad níos ilghnéithí agus níos domhandaithe, i gcomhréir leis na n-onnmhairí agus leis an mbonn Infheistíocht Dhíreach Eachtrach (IDE) atá ag fás agus ag forbairt.
Mhol an Sainghrúpa gníomhartha beartais tábhachtacha chun cabhrú le gnóthais slabhraí soláthair níos seasmhaí a thógáil, lena n-áirítear an gá le súil a choinneáil go rialta ar na braistintí trádála; comhoibriú le tionscal agus le comhpháirtithe idirnáisiúnta chun slabhraí soláthair a scrúdú faoi thástáil struis; tacaíochtaí comhairleacha dírithe chun cuidiú le cuideachtaí ina measúnú riosca; plé rialta leis na páirtithe leasmhara; leanúint leis an tacaíocht do mhargaí idirnáisiúnta oscailte agus a chinntiú go bhfuil córais éascaíochta trádála den chéad scoth ann.
Treisíonn an Sainghrúpa béim freisin ar an ngá atá ann, chun rannpháirtíocht éifeachtach a bhaint amach i slabhraí luacha domhanda, go mbeidh infheistíocht leanúnach agus fadtéarmach de dhíth sa chóras nuálaíochta, i mbonneagar, i ngnéithe straitéiseacha, i gceannaireacht agus i scileanna, i gcumas digiteach agus i modhanna táirgeachta inbhuanaithe, ionas gur féidir le cuideachtaí fanacht solúbtha agus aclaí sa timpeallacht idirnáisiúnta.
CRÍOCH